Gasteizko Antzokien Udal Sareak uda honetarako programazioa aurkeztu du. Uztailaren 12tik irailaren 29ra bitartean Principal Antzokiak, besteak beste, Josema Yuste, Antonio Molero eta Carmen Conesaren komedia berriak hartuko ditu. Guztira 23 saio izango dira eta komedia eta musika izango dira nagusi.
Udako programazioa Gasteizko Nazioarteko Jazzaldiaren 46. edizioaren barruan izango den ‘Jazz-a antzokian’ zikloarekin hasiko da. Ziklo horren barruan bost kontzertu eskainiko dira uztailaren 12tik 17ra bitartean. Kontzertuak honako hauek izango dira:
Euskadiko Ikasleen Jazz Orkestra (uztailak 12), Yessaï Karapetian (uztailak 13), Marcin Masecki+Jerzy Rogiewicz-Ragtime (uztailak 14), James Brandon Lewis (uztailak 15) eta Kassa Overall (uztailak 16). Kontzertu guztiak 17:30etan hasiko dira eta sarrerak jada salgai daude.
Uztailaren 21ean Euskalherriko Gazte Orkestraren txanda izango da. Egun horretan euskal musikari gazteek eszenatokia partekatuko dute Joven Orquesta de Canarias-ekin (JOCAN). Bi orkestra gazteek Nemanja Radulovic biolinista ospetsuaren laguntza izango dute Mendelssohnen lanan eta Tchaikovskyren ‘Biolinerako kontzertua’n oinarritutako kontzertua eskaintzeko.
Gainera, uztailaren 29tik 31ra bitartean Mayumaná talde ezagunak bere ‘Currents’ ikuskizuna eskainiko dira. Saio horiek bertan behera geratu ziren pandemiaren eraginez.
Ander Maria Zuriaren Jaiak
Jaietan komedia izango da nagusi Antzokien Udal Sarearen programazioan. Abuztuaren 4an eta 5ean Principal Antzokian Antonio Molero, Marina San José, Leo Rivera eta Mónica Pérezen ‘Escape Room’ antzezlana ikusi ahal izango da.
Abuztuaren 6an eta 7an, berriz, ‘El peligro de las buenas compañías’ antzezlana izango da ikusgai Fernando Cayo, Carmen Conesa, Ernesto Arias eta Miriam Montillarekin.
Jaietako programazioari amaiera emango dion antzezlana Josema Yusteren ‘El Aguafiestas’ da. Yuste zuzendaria izateaz gain, aktore lanak ere egingo ditu Santiago Urrialde, Maribel Lara, Vicente Renovell, Kiko Ortega eta Arturo Venegasekin batera.
Irailean, Metamorphosis dance konpainiaren ‘Prisma’ lanaren estreinaldia izango da. Iratxe Ansak (Dantzako Sari Nazionala) eta Igor Bacovichek osatzen dute konpainia eta dantza-lan onenaren Max Saria irabazi berri dute.
