Ofcomek Erresuma Batuko nerabeekin egin duen azterlan baten arabera, gazteek ohiko albiste-iturriak baino nahiago dituzte sare sozialak eguneratuta egoteko. Zehazki, azterlanak ondorioztatu duenez, Instagram (gazteen % 29k erabiltzen du), TikTok eta YouTube (biak % 28rekin) lirateke nerabeen hiru albiste iturri nagusiak.
Tradizionalki nerabeen artean albiste-iturri nagusia izan diren BBC One eta BBC Two telebista kateak bosgarren posturaino jaitsi dira. Gaur egun gazteen laurden batek (% 24) erabiltzen du telebista berriak jasotzeko. Duela bost urte kopuru hori % 45ekoa zen, hots, ia bikoitza. Hori nerabeen artean bakarrik eman den fenomenoa da, aipatu kateak Erresuma Batuko biztanleria orokorraren albiste-iturri nagusiak izaten jarraitzen baitute. Hala ere, helduen artean ere gero eta gutxiago dira telebistara jotzen dutenak albisteen bila.
Aitzitik, 2020tik 2022ra bitartean, TikTok da edozein albiste-iturriren erabileran hazkunde handiena izan duena: 2020an Erresuma Batuko 0,8 milioi helduk (% 1) erabiltzen zuten kanal hori eta orain, berriz, 3,9 milioi helduk (% 7). Kopuru horiekin Sky News bezalako albiste-katearen parean kokatu da.
Kontuz irakurtzen dugun horrekin
Erresuma Batuan gertatzen dena gure inguruko herrialdeei aplika dakieke. Gero eta gazte gehiago joaten dira kanal horietara informatzeko. Badirudi gazteen eta influencer-en arteko loturan dagoela gakoa; hedabide tradizionalek lortzen ez dutena. Baina kontuz! Sare sozialetan aurki daitekeen informazio ez baita guztiz fidagarria. Adibidez, News Guarden ikerketa baten arabera, albisteei buruzko TikTok bideoen ia % 20k informazio okerra dute. Eta gazte asko ez dira gai benetakoaren eta faltsuaren artean bereizteko.
