Gizartea, edo hau osatzen duen sektore bat, ezagutzeko azterketa soziologikoak erabiltzen dira. Gazteeen Euskal Behatokiak ‘Gazteen argazkiak 14’ izenburupean euskal gazteriaren argazkia atera nahi izan duen azterketa soziologikoaren emaitzak ezagutzera eman ditu berriki. Azterketa hau, kultura demokratikoa du ardatz

Ikerketa honetatik atera daitekeen lehen ondorio garbia honakoa da: euskal gazteria pozik bizi da (%75ak hala onartzen du behintzat) eta ez hori bakarrik, aurrera begira, eta nahiz eta krisi ekonomiko batean murgildurik izan, bere egoera pertsonalak hoberuntz egingo duela uste du gazteen gehiengoak (%64). Gazteak gehien kezkatzen dituzten arazoen artean, beti ere ikerketa honen arabera, arazo ekonomikoak dira kezka gehien sortzen dituztenak, hauen barruan, lan merkatuari lotutako arazoak, arazo ekonomikoak eta etxebizitza kokatzen direlarik. Aipatu hiru arazo hauek gazteriak kezkatzen dituen arazoen sailkapeneko lehen hiru postuetan aurkizten dira. Komunikabideetan hainbat gaztek ETArekiko azaldu duten jarrera dela eta oihartzun handia izan badu ere, Euskadik bizi duen egoera politikoa eta indarkeria/terrorismoa aipatu sailkapen horretako zortzigarren eta bederatzigarren postuetan azaltzen dira hurrenez hurren.

Gizarte balio eta portaerak
Bizitzako alderdi desberdinen inguruan galdetuta, gazteek familian eta bikotean harreman onak izateari ematen diote garrantzi gehien. Honi lotuta, bizitza sexual ona izateari ere garrantzi handia ematen diote. Ildo berean, euskal gazteentzat garrantzitsua da kultur eta lan prestakuntza egokia izatea, lanean arrakasta izatea eta dirua irabaztea. Kontrako aldean, gazteriak ez die garrantzia handirik ematen ez gai politikoei ezta gai erlijiosoei ere. Azken bi hauen inguruko jarduera zehatzei buruz galdetuta gazteen gehiengoak sexu bereko pertsonen arteko ezkontzaren inguruan (%85a beti edo ia beti ados), aborto librearen inguruan  (%72) eta Eutanasiaren inguruan (%70) adostasuna azaltzen dute. Adostasun handiagoa lortzen da zenbait gaien inguruko kontrako iritzia azaltzerakoan. Horrela, gazteen gehiengoa gai honen kontrako desadostasuna azaltzen du beti edo ia beti: Ideia politiko edo erlijiosoak indarrez defendatzea (%86), suizidioa (%73), dendetatik gauzak ordaindu gabe eramatea (%92), heriotz-zigorra (%82) delitu bat ikustean salaketarik ez egitea (%82), polizia erasotzea (%88) edota bikotekideari fidela ez izatea (%88).ETAren jarduerari buruz galdetzerakoan, gazteen gehiengoak soilik erantzun bakarrean iristen da gehiengora. ETAk egiten dituen ekintzat Euskadirentzat onuragarriak diren ala ez galdetzean gazteen %51ak ezetz dio, baina gai honen inguruan egindako bestelako galderetan ez da halako portzentaietara iristen. Galdera hauetan, ETAren kontrako iritzia nagusi bada ere erantzunen ehunekoak askoz ere orekatuagoak daude. Zentzu honetan, gazteriaren gehiengoa ekintza terroristen biktimek laguntza eta babesa merezi dutela adierazten dute (%46 oso ados eta %25 nahikoa ados).

Jarrera politikoak
Ikerketaren ondoriorik esanguratsuenetako bat gazteriak politikarekiko duen interes falta da. Politikak zein nolako sentimenduak sortzen dizkien galdetzean, erantzun nagusiak honako hauek izan dira: konfidantza eza, asperdura, axolagabekeria eta haserrea. Gazteriaren %78ak politikarekiko interes gutxi edo oso gutxi duela adierazi du. Lau gaztetatik hiruk politikariek bakarrik interes pertsonalak bilatzen dituztela uste du, eta antzeko kopuruan politikariek gazteriaz arduratzen ez direla uste du. Ezker-eskuin eskala batean, euskal gazteria nahiko zentratuta azaltzen da, agian, izaera ezkertiar nabariago batekin. Gauza bera gertatzen da nazionalista eta ez nazionalista eskala batean; emaitzak nahiko orekatuak dira baina izaera nazionalista gutxigatik nagusitzen delarik. Gazteen %30ak bere burua apolitikotzat jotzen du.

Sozializazioa
Sozializazio eta parte hartze politikoaren inguruan, gazteriaren gehiengoak onartzen du bere etxean ez dela sarritan politikaren inguruan hitzegiten. Horretarako arrazoi nagusiak gaiarekiko interes falta eta gatazka pertsonalak ekiditzeko nahia aipatzen dira.Ekintza politikoren batean parte hartuko luketen ala ez galdetzean, hauek dira begi onez ikusten diren ekintza nagusiak: greba batean parte hartu, baimendutamo manifestazio batera joan, arrazoi politikoren batengatik produktu bat erosi eta eskaera aldarrikatzaile bat sinatu. Oso gutxi dira alderdi politikoren batekin lankidetzan aritzeko prest azaltzen direnak.

Demokraziaren funtzionamendua
Gazteen ia %50a jende guztiarekin politikaz hitz egiteko libre sentitzen da, baina antzeko kopuruan aurkitzen dira soilik pertsona batzuekin hitzegiteko libre sentitzen direnak onartzen dutenak. Ideia politikoak bake bideetatik defendatzeko aukeren inguruan galdetzean, gutxigatik bada ere, gehiengoa ez da oso pozik azaltzen. Ildo beran Espainia ea estatu demokratikoa den ala ez galdetzean, gazteek baietz erantzuten dute, baina estatu zeharo demokratikoa suposatuko lukeen puntuaziotik urrun (%47ak Espainian den demokraziaren funtzionamenduarekin ez oso pozik edo batere pozik ez dagoela onartzen du). Giza eskubideen inguruan galdetuta, hauek dira baloraziorik onenak lortu dituztenak: Iritzi eta adierazpen askatasuna (%57), Lana (%49), Bizitza eskubidea edozein ideia politiko izanda (%45), Hezkuntza (%38), Etxebizitza duina (%36), osasuna (%35).

Lurralde antolamendua
EAEko Autonomia estatutuaren inguruan galdetuta, iritziak nahikoa banatuta daude. %23a pozik azaltzen da eta %15 ez; %61ak berriz, neurri batean azaltzen da pozik edo ez du erantzuten. Autogobernu mailaren inguruan, berriz, %34ak ez du erantzuten eta erantzuten dutenen artean puntu gehien lortzen duen aukera independentzia planteatu beharko litzatekeenarena da (%23). Bigarren aukera sailkapen honetan Gernikako Estatutua osoki betetzearena da (%14).

1 COMMENT

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.